ໃນວັນທີ 18 ມິຖຸນາ 2015 ທີ່ສະພາແຫ່ງຊາດ ທ່ານ ດຣ. ບຸນຈັນ ສິນທະວົງ ລັດຖະມົນຕີ ວ່າການກະຊວງໂຍທາທິການ ແລະ ຂົນສົ່ງ ໄດ້ໄຂຂໍ້ຂ້ອງໃຈຂອງປະຊາຊົນທີ່ໄດ້ໂທເຂົ້າສາຍດ່ວນສະພາ ໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VII.
ກ່ຽວກັບການແກ້ໄຂບັນຫາ ບໍລິສັດ ຫຼົງຟູ (ຈີນ) ທີ່ສ້າງຕຶກ 3 ຊັ້ນ ກວມເອົາຄອງນ້ຳ (ຢູ່ບ້ານໂພນສະອາດ) ໂດຍສະເພາະ ເສັ້ນທາງລຽບຕາມຄອງນ້ຳ ທີ່ປະຊາຊົນທຽວໄປມານັ້ນ ພາໃຫ້ບໍ່ສາມາດທຽວໄດ້ຄືເກົ່າວ່າ: ອີງຕາມການລາຍງານຂອງກົມຜັງເມືອງໃນເບື້ອງຕົ້ນ ໂຄງການດັ່ງກ່າວ ໄດ້ຈັດຕັ້ງປະຕິບັດຕາມແຈ້ງການແນະນຳ ສະບັບເລກທີ 015/ຈນວ ລົງວັນທີ 22/12/2013 ມາຮອດວັນທີ 22/12/2014 ໄດ້ມີ
ໜັງສືຂອງບໍລິສັດ ຫຼົງຝູລົງທຶນ ຈຳກັດ ຫາພະແນກໂຍທາທິການ ແລະ ຂົນສົ່ງ ນວ ກ່ຽວກັບການຂໍອະນຸຍາດການສ້າງອາຄານກວມເອົາຮ່ອງລະບາຍນ້ຳ (ຮ່ອງໄກ່ແກ້ວ) ຜ່ານການຄົ້ນຄວ້າຂອງພະແນກໂຍທາທິການ ແລະ ຂົນສົ່ງ ນວ ໂດຍສົມທົບກັບພາກສ່ວນທີ່ກ່ຽວຂ້ອງ ໃນເບື້ອງຕົ້ນ ເຫັນວ່າຂອບເຂດການກໍ່ສ້າງສູນການຄ້າບໍລິສັດ ຫຼົງຝູລົງທຶນ ຈຳກັດ ແມ່ນບໍ່ໃຫ້ກວມເອົາເຂດຮ່ອງລະບາຍນ້ຳຮ່ອງໄກ່ແກ້ວ ແລະ ເສັ້ນທາງແຄມຮ່ອງສອງເບື້ອງ ເຊິ່ງແມ່ນຂອບເຂດຫວງຫ້າມ ບໍ່ໃຫ້ມີການປຸກສ້າງ (ແຕ່ບໍລິສັດດັ່ງກ່າວລະເມີດ) ປັດຈຸບັນ ພະແນກໂຍທາທິການ ແລະ ຂົນສົ່ງ ນວ ໄດ້ສັ່ງໂຈະໂຄງການດັ່ງກ່າວຊົ່ວຄາວ ແລະ ໃຫ້ໂຄງການດັ່ງກ່າວ ເປີດເສັ້ນທາງແຄມຮ່ອງ 2 ເບື້ອງ ເພື່ອໃຫ້ປະຊາຊົນໄດ້ສັນຈອນເຂົ້າອອກຄືນເປັນປົກກະຕິ ແລະ ພະແນກ ຍທຂ ນວ ກໍ່ໄດ້ເຮັດບົດບັນທຶກດັ່ງກ່າວ ເພື່ອແກ້ໄຂບັນຫາສະເພາະໜ້າ ໂດຍສະເພາະໃນໄລຍະລະດູຝົນ ບໍ່ໃຫ້ຮ່ອງຖືອຸດຕັນໃນບໍລິເວນດັ່ງກ່າວ ເຊິ່ງຈະເຮັດໃຫ້ນ້ຳຖ້ວມໃນບໍລິເວນໃກ້ຄຽງ.
ຕໍ່ບັນຫານີ້ ກະຊວງໂຍທາທິການ ແລະ ຂົນສົ່ງ ໃນນາມເຮັດໜ້າທີ່ມະຫາພາກ ຈະໄດ້ຊີ້ນຳຊຸກຍູ້ໃຫ້ພະແນກ ຍທຂ ນວ ສົມທົບກັບຫ້ອງການ ຍທຂ ເມືອງ ລົງຕິດຕາມກວດກາສະພາບຕົວຈິງ ພ້ອມທັງແກ້ໄຂບັນຫາຕ່າງໆທີ່ເກີດຂຶ້ນ ຕາມລະບຽບກົດໝາຍທີ່ມີແລ້ວຢ່າງເຂັ້ມງວດ ເຊັ່ນ: ກົດໝາຍວ່າດ້ວຍຜັງເມືອງ ກົດໝາຍວ່າດ້ວຍການກໍ່ສ້າງ ແລະ ກົດລະບຽບວ່າດ້ວຍການຄຸ້ມຄອງປຸກສ້າງ ສະບັບເລກທີ 621/ກຄຜ ລົງວັນທີ 11/11/2013.
No comments:
Post a Comment